കൂരാച്ചുണ്ടിലേക്കുള്ള മാലിന്യ വാഹനങ്ങൾ തടയും: യൂത്ത് കോൺഗ്രസ്

അനധികൃത പന്നിഫാമിന്റെ മറവിൽ പഞ്ചായത്തിന്റെ വിവിധ മേഖലകളിൽ മാലിന്യവുമായി വരുന്ന വാഹനങ്ങൾ തടയുമെന്ന് മണ്ഡലം യൂത്ത് കോൺഗ്രസ് കമ്മിറ്റി. മാസങ്ങളോളമായി വിവിധ പ്രദേശങ്ങളിൽ തള്ളുന്ന മാലിന്യങ്ങൾ ഗുരുതരമായ ആരോഗ്യ പ്രശ്നങ്ങളാണ് സൃഷ്ടിക്കുന്നത്. കുടിവെള്ളം ഉൾപ്പെടെ മലിനപ്പെടുന്നതിനാൽ കടുത്ത വേനലിൽ ജനങ്ങൾ ദുരിതത്തിലാണ്. മണ്ഡലം പ്രസിഡന്റ് ജെറിൻ കുര്യാക്കോസ് ആധ്യക്ഷ്യം വഹിച്ചു. നിസാം കക്കയം, ജോസ്ബിൻ കുര്യാക്കോസ്, കെ.വി. ഡെന്നി, റസാക്ക് മരോട്ടിക്കൽ, വിഷ്ണു പൂവത്താംകുന്ന്, ബ്ലോവിൻ തേക്കാനത്ത്, അഗസ്റ്റിൻ പോളി, ലിനറ്റ് പി. ജോസ് എന്നിവർ പ്രസംഗിച്ചു.